Ургамал сум нь 1924 оны 12 сард орон нутгийн анхны сонгууль болж тус  сум анх "Буурал нарт"  нэртэйгээр  нутгийн тайж Б.Батсүлдийг сумын даргаар сонгожээ: Сумыг дотор нь гурван тавин, тавиныг арван гэрүүдээр зохион  байгуулж, арван гэрүүдийн даргаар нутгийн ард Н.Нацаг, Ө.Сэд, Б.Буньжав нарын 15 хүн сонгогдсон.
Тус сум нь 1924-1925 онд Буурал нарт, 1926-1928 онд Сартуул, 1929-1933 онд Хутаг УУл, 1934-1937 онд Ургамал Өлзийт гэж нэрлэгдэж байгаад 1938 оноос Ургамал сум болсон
Тус сум нь нийслэл хотоос 1236 км, аймгийн төвөөс 236 км алслагдсан. газар нутгийн хувьд Их нууруудын хотгортой зах залгаа нам дор говирхог буюу элсэрхэг хөрстэй, далайн төвшнөөс дээш 1201-2117 метр, хамгийн нам дор газар нь Сайхан бөгөөд 1201 метр өндөр Аргалын хар уул юм. Түүнчлэн дэлхийн бөмбөрцгийн зүүн уртрагийн 93 градус, умард өртөргийн 97 градуст оршдог.
Сумын хилийн нийт урт-255 км, 347,6 мянган га нутагтай. Тус сумыг Ургамал гэж нэрлэсэн нь Хульжийн голоос дээш Аргалант сээрийн эхэнд байдаг Ургамал гэдэг уулын нэртэй дүйж байгаагаас гадна энэ нутагт таван төрлийн малын тэжээлд тохирох амт чанар шим тэжээл сайтай 600 гаруй нэрийн ургамал,хүнсний тэжээлд хэрэглэдэг сульхир, хар суль, зэрлэг буудай, цагаан мангир, мангина, гоёо, эмийн ургамал болох чихэр өвс, дэгд, юмдүүжин, тэмээн хөх, зангуу, зээргэнэ, бударгана, ортууз, шувуун хөл, бэвлэн байдаг нь Ургамал гэж нэрлэхэд нөлөөлсөн байх талтай.
Ургамал сумын нутагт Хуйхын цахирын ууланд байдаг Гандгир/ганцхан мод/, Цагаанхайрхан ууланд байдаг Хутаг уулын ус шуугидаг хөндий хад, Ханын худгийн ард байдаг Уст уул, мөн Тост хэмээх толгой, шавгийн гацааны чихэр өвстэй тохой, Харцагатын улааны цул хаднаас ургасан харгана,Голын улааны рашаан, Гүн нуур, Зөөхий нуур гэх үзэсгэлэнт газрууд байдаг.